Asif n Wansifn

Talɣa:Asif Asif n wansifn nɣ Asif n isaffn (s taɛrabt : نهر أم الربيع Umm rrabiɛ) iga yan wasif bahra imqqurn ɣ tmazirt n Lmɣrib. Yullid wasif n Wansifn sg idrarn n waṭlaṣ anammas issudu s umnid n umalu allig nn iffi g taman tiɣrmt n Uzmmur, ɣ ugaru (océan) Aṭṭlanṭi. Tiɣzi gis 555 Km, tamkta n waman sgis izrrin ar traḥan ar 117 m3/s, ɣayadd a yudjan asif n wansifn ad ig asif wiss sin g tmazirt n Lmɣrib.

Isaffn n Tasawt d Wad lɛbid gan isaffn imqqran dadd i-tt-ffin g wasif n wansifn, ssin itsn uckand sg idrarn n waṭlaṣ amqqran, sg tmnaḍin Infḍwak d Innultan, sɣ tsga n unẓul.

Asif n wansifn yattuy bahra watig nns ɣ umzruy tmazirt n Lmɣrib d umaḍal aqbur, iqqim iga iwtta gr tagldit n Fas d Tagldit Murrukc g uzmz Iwaṭṭasn d Imarinn, allig d ikcm urumi Afranṣawi s Lmɣrib g usggas n 1912. Ig daɣ asif-ad iwtta ingr tiqqbilin n Ccawiyya d Rrḥamna, tili dars daɣ yat tawwri tagjdant g tibḍit tatrart n Murrukc, illa ingr Tasga n Mrrakc-Asfi d tasga n Tigmmi tumlilt-Sttat.

Tiwlafin

• 
  Iɣbula
• 
  Uggʷug n Aḥmad Lḥanṣali
• 
  Asif n Wansifn
• 
  Tawada n wasif
• 
  Aman g wansifn

Assaɣ

Assaɣ aqqbur igat Wansifn s unamk n wasif n isaffn nɣ asif kullu imqqurn, acku asif ad iga asif kullu ymqqurn g tamnaḍt-ad lli g illa, ayaɣ af as gan s wassaɣ asif amqqran nɣ asif n isaffn, ɣmklli isawl f wassaɣ ad Lyyun Al afriqi g udlis-ns Waṣf ifriqya, adlis ad lli igan yan sg igjda n tussna n Lmɣrib aqqbur d tussna iqqbiln-ns.

G tasut tiss 16 assaɣ ad i-tt-ussnfal s wassaɣ n Umm rrbiɛ, assaɣ ad nna igan assaɣ n yan iɣrm sg iɣrman nna ɣ izray f wasif ad, macc assaɣ n iɣrm ad igat Umm Rabiɛ ɣmklli inna Muḥmmad Al idrisi g udlis nns Nuzzhat Almuctaqq.

Assaɣn yaḍni

Iṭṭaf asif ad kigan n ismawn nɣ wassaɣn yaḍni, zun d :

• Asif n isaffn
• Umm rrbiɛ
• Anatis
• Asana
• Morbeia
• Morbea
• Morbia
• Oum-er-Rbia

Aglam

Ard i-tt-nbaɛ wasif n wansifn sg idrarn waṭlaṣ anammas, sg taɣzi n $1800m$ f uflla n wakal, aggugn iɣbula ns f tamdint n Xnifra s $40Km$, aggugn daɣ f iɣrem n Mrirt s $26Km$.

Asif nnaɣ sg iɣrem n Xnifra ifka yixf nns s umnid n iffus, ilma yekcem s uẓaɣar n Tadla, ilma kcmnd sers isaffn n Tasawt d Wad lxḍer d wasif n Wad lɛbid sg iẓẓelmḍ.

Amda alilan

Amda alilan n wasif n wansifn dars yat tajumma n $35000K{m}^2$ .

Isaffn

Asif n Wansifn

• Asif n Tasawt
• Asif n Wad lxḍer
• Asif n Wad lɛbid
• Asif n Sru
• Asif n Cbuka
• Asif n Wawman
• Asif n Drna

Amawal

• Amda alilan  : حوض مائي
• ililan  : ماء
• Amda  : حوض
• Agjdan  : رئيسي
• Agaru  : محيط
• Uẓẓun : حد فاصل
• Aktum  : صبيب ,débit
• Amda alilan : حوض مائي sg ililan : ماء
• Aglam : وصف، description
• Tamzazt : جريان, mouvemnt d'une rivière
• Amɣlal : دائم, permannt

Iɣbula

• Wikipidya Taqbaylit - Asif n wansifn - s tutlayt taqbaylit
• Encyclopedie Berbere - Khénifra yura tt M. Peyro - 2005 - s tutlayt tafṛansist
• Wikipidya Taɛrabt - نهر أم الربيع - s tutlayt taɛrabt
• Mawdoo3.com - أين يقع نهر أم الربيع - s tutlayt taɛrabt
• AA.com - شلالات "أم الربيع" بالمغرب... سحر يتدفق بين جبال الأطلس - s tutlayt taɛrabt
• Alquds.co.uk - أزمور المغربية تتكئ على نهر أم الربيع وتستنشق عبق التاريخ - s tutlayt taɛrabt

Ẓr uggar

• Aṭlas anammas
• Asif n Dra
• Asif n Dads
• Asif
• Asif n Tamri